اسلام آباد: وفاقی حکومت نے بے نظیر انکم سپورٹ پروگرام (بی آئی ایس پی) کو صوبائی حکومتوں کے سپرد کرنے کی تجویز پر غور شروع کر دیا ہے، جس کے بعد سماجی امدادی نظام کے مستقبل پر نئی بحث شروع ہو گئی ہے۔
وفاقی وزیر داس کوہستانی نے کہا کہ 18ویں آئینی ترمیم کے بعد متعدد اختیارات صوبوں کو منتقل ہو چکے ہیں، اس لیے امدادی رقوم کی تقسیم کا نظام بھی صوبائی سطح پر منتقل کیا جا سکتا ہے۔
انہوں نے بتایا کہ بعض صوبوں نے مطالبہ کیا ہے کہ بی آئی ایس پی کو صوبائی حکومتوں کے ذریعے چلایا جائے تاکہ مستحق افراد تک امداد کی فراہمی زیادہ مؤثر انداز میں ممکن بنائی جا سکے۔
وفاقی وزیر کے مطابق حکومت کسی بھی حتمی فیصلے سے پہلے اتحادی جماعتوں اور دیگر سیاسی اسٹیک ہولڈرز سے مشاورت کرے گی تاکہ تمام پہلوؤں کا تفصیلی جائزہ لیا جا سکے۔
داس کوہستانی نے واضح کیا کہ حکومت پروگرام کو ختم کرنے پر غور نہیں کر رہی بلکہ اس کے انتظامی ڈھانچے میں ممکنہ تبدیلیوں کا جائزہ لیا جا رہا ہے۔
واضح رہے کہ بے نظیر انکم سپورٹ پروگرام ملک کا سب سے بڑا سماجی تحفظ کا منصوبہ ہے، جس کے تحت لاکھوں مستحق خاندانوں کو مالی امداد فراہم کی جاتی ہے۔
