پنجاب میں 4 نئے اضلاع بنانے کا معاملہ، پتوکی، دیپالپور، حاصل پور اور ہارون آباد شامل
لاہور: پنجاب میں 4 نئے انتظامی اضلاع بنانے سے متعلق مبینہ سرکاری نوٹیفکیشن سوشل میڈیا پر زیر گردش ہے، جس کے مطابق صوبے میں اضلاع کی تعداد 41 سے بڑھ کر 45 ہو جائے گی۔
زیر گردش نوٹیفکیشن کے مطابق پنجاب لینڈ ریونیو ایکٹ 1967 کے تحت انتظامی جائزے کے بعد 4 نئے اضلاع کے قیام کی منظوری دی گئی ہے۔ نئے اضلاع میں پتوکی، دیپالپور، حاصل پور اور ہارون آباد شامل ہیں۔
دستاویز کے مطابق پتوکی کو ضلع قصور سے الگ کر کے نیا ضلع بنایا گیا ہے، جس کا ضلعی ہیڈکوارٹر پتوکی سٹی ہوگا۔ دیپالپور کو ضلع اوکاڑہ سے الگ کیا گیا ہے اور اس کا ہیڈکوارٹر دیپالپور سٹی مقرر کیا گیا ہے۔
اسی طرح حاصل پور کو ضلع بہاولپور سے الگ کر کے نیا ضلع بنانے کی تجویز دی گئی ہے، جس کا ہیڈکوارٹر حاصل پور سٹی ہوگا، جبکہ ہارون آباد کو ضلع بہاولنگر سے الگ کر کے نیا ضلع بنایا جائے گا اور اس کا ہیڈکوارٹر ہارون آباد سٹی ہوگا۔
نوٹیفکیشن میں کہا گیا ہے کہ نئے اضلاع کی حدود اور انتظامی دائرہ کار بورڈ آف ریونیو پنجاب کی جانب سے الگ سے جاری کردہ نوٹیفکیشنز کے مطابق ہوگا۔
متعلقہ محکموں کو ہدایت کی گئی ہے کہ نئے ضلعی ہیڈکوارٹرز کے قیام، وسائل کی تقسیم اور انتظامی عملے کی تعیناتی کے لیے فوری اقدامات شروع کیے جائیں۔
تاہم اس نوٹیفکیشن کی سرکاری سطح پر مزید تصدیق ضروری ہے، کیونکہ ایسے انتظامی فیصلوں کی حتمی حیثیت متعلقہ محکموں کی باضابطہ اشاعت اور سرکاری ریکارڈ سے واضح ہوتی ہے۔
