کراچی: پاکستان ریلوے میں ٹرینوں کی مسلسل تاخیر معمول بنتی جا رہی ہے، جس کے باعث روزانہ ہزاروں نہیں بلکہ لاکھوں مسافروں کو شدید مشکلات اور ذہنی اذیت کا سامنا کرنا پڑ رہا ہے۔
تازہ ترین شیڈول کے مطابق پاکستان ایکسپریس 45-اپ کو بھی مقررہ وقت کے بجائے ایک گھنٹہ 45 منٹ تاخیر سے روانہ کرنے کا اعلان کیا گیا ہے، جبکہ ریلوے انتظامیہ کی جانب سے تاخیر کم کرنے کی یقین دہانیاں ایک بار پھر دہرائی جا رہی ہیں۔
مسافروں کا کہنا ہے کہ ٹرینوں کی تاخیر اب استثنا نہیں بلکہ روزمرہ کا معمول بن چکی ہے۔ ریلوے اسٹیشنوں پر گھنٹوں انتظار کرنے والے شہریوں کا مؤقف ہے کہ بار بار تاخیر کے باعث ان کے کاروباری، تعلیمی اور خاندانی معاملات متاثر ہو رہے ہیں، لیکن متعلقہ حکام اس مسئلے کے مستقل حل میں ناکام نظر آتے ہیں۔
سفر کرنے والے افراد کا کہنا ہے کہ ریلوے انتظامیہ ہر بار عارضی شیڈول اور تکنیکی وجوہات کا حوالہ دیتی ہے، مگر عملی طور پر صورتحال میں کوئی نمایاں بہتری دکھائی نہیں دیتی۔ خاص طور پر طویل فاصلے کی ٹرینوں کے مسافروں کو شدید پریشانی کا سامنا کرنا پڑتا ہے۔
ماہرین کے مطابق پاکستان ریلوے کو جدید خطوط پر استوار کرنے، آپریشنل نظم و نسق بہتر بنانے اور وقت کی پابندی یقینی بنانے کے لیے فوری اور مؤثر اقدامات کی ضرورت ہے، کیونکہ مسلسل تاخیر سے عوام کا اعتماد متاثر ہو رہا ہے۔
مسافروں نے حکومت اور وزارت ریلوے سے مطالبہ کیا ہے کہ ٹرینوں کی بروقت روانگی اور آمد کو یقینی بنانے کے لیے ہنگامی بنیادوں پر اصلاحات کی جائیں تاکہ عوام کو روزانہ کی اس پریشانی سے نجات مل سکے۔
عوامی حلقوں کا کہنا ہے کہ اگر ریلوے کو واقعی سستا اور قابلِ اعتماد سفری ذریعہ بنانا ہے تو وقت کی پابندی کو اولین ترجیح بنانا ہوگی، ورنہ مسافروں کا ریلوے پر اعتماد مزید کمزور ہوتا جائے گا۔
