بوٹ بیسن پولیس کی کارروائی، بدنام زمانہ منشیات فروش یاسین عرف شوٹر گرفتار

کراچی: ڈسٹرکٹ ساؤتھ پولیس نے منشیات فروشوں کے خلاف جاری مہم کے دوران ایک اہم کامیابی حاصل کرتے ہوئے بوٹ بیسن کے علاقے میں کارروائی کے دوران بدنام زمانہ منشیات فروش یاسین عرف شوٹر کو گرفتار کر لیا۔

پولیس ترجمان کے مطابق بوٹ بیسن پولیس کو خفیہ ذرائع سے اطلاع موصول ہوئی تھی کہ ایک مطلوب منشیات فروش علاقے میں موجود ہے اور منشیات کی سپلائی میں سرگرم ہے۔ اطلاع ملتے ہی پولیس نے فوری طور پر کارروائی کرتے ہوئے ملزم کی گرفتاری کے لیے چھاپہ مارا۔

پولیس کے پہنچنے پر ملزم نے فرار ہونے کی کوشش کی تاہم بوٹ بیسن پولیس کی ٹیم نے تعاقب کرتے ہوئے اسے گرفتار کر لیا۔ گرفتار ملزم کی شناخت یاسین عرف شوٹر کے نام سے ہوئی ہے، جو قانون نافذ کرنے والے اداروں کو مختلف مقدمات میں مطلوب تھا۔

پولیس کے مطابق ملزم کے قبضے سے 55 گرام آئس (Crystal Meth) برآمد ہوئی، جسے قبضے میں لے کر قانونی کارروائی شروع کر دی گئی ہے۔ ابتدائی تفتیش کے دوران معلوم ہوا ہے کہ ملزم کلفٹن اور ڈیفنس سمیت شہر کے مختلف علاقوں میں منشیات کی سپلائی کے نیٹ ورک سے وابستہ رہا ہے۔

پولیس حکام کا کہنا ہے کہ یاسین عرف شوٹر اس سے قبل بھی پولیس کارروائیوں کے دوران فرار ہونے میں کامیاب ہو چکا تھا جبکہ تھانہ بوٹ بیسن میں درج مختلف مقدمات میں مفرور ہونے کے باعث پولیس کو مطلوب تھا۔

گرفتار ملزم کے خلاف تازہ مقدمہ درج کر لیا گیا ہے اور مزید تفتیش جاری ہے تاکہ اس کے دیگر ساتھیوں اور منشیات کے نیٹ ورک کے بارے میں معلومات حاصل کی جا سکیں۔ پولیس کا کہنا ہے کہ منشیات فروشوں کے خلاف کارروائیاں بلا امتیاز جاری رہیں گی اور شہر میں منشیات کے پھیلاؤ کو روکنے کے لیے تمام ممکنہ اقدامات کیے جا رہے ہیں۔

ترجمان ڈسٹرکٹ ساؤتھ پولیس اور ایس ایس پی مہزور علی کے مطابق ملزم کے خلاف مزید قانونی کارروائی عمل میں لائی جا رہی ہے۔