اسلام آباد: وفاقی دارالحکومت کے سیکٹر آئی-10 میں واقع ایک رہائشی گھر میں گیس سلنڈر دھماکے کے نتیجے میں 2 افراد جاں بحق جبکہ متعدد افراد زخمی ہو گئے۔ واقعے کے بعد علاقے میں خوف و ہراس پھیل گیا اور امدادی کارروائیاں فوری طور پر شروع کر دی گئیں۔
ریسکیو حکام کے مطابق دھماکہ گھر کے فرسٹ فلور پر واقع کچن میں گیس لیکیج کے باعث پیش آیا، جس کے نتیجے میں سلنڈر پھٹ گیا اور گھر میں آگ بھڑک اٹھی۔ دھماکے کی شدت سے گھر کے مختلف حصوں کو بھی نقصان پہنچا۔
امدادی اداروں کے مطابق حادثے میں مجموعی طور پر 5 افراد جھلس کر زخمی ہوئے، جنہیں فوری طبی امداد کے لیے قریبی اسپتال منتقل کیا گیا۔ بعد ازاں زخمیوں میں سے 2 افراد زخموں کی تاب نہ لاتے ہوئے جان کی بازی ہار گئے۔
فائر بریگیڈ اور ریسکیو ٹیمیں اطلاع ملتے ہی موقع پر پہنچ گئیں اور بروقت کارروائی کرتے ہوئے آگ پر قابو پا لیا، جس سے مزید نقصان کو روکنے میں مدد ملی۔
پولیس اور متعلقہ اداروں نے واقعے کی تحقیقات شروع کر دی ہیں، جبکہ ابتدائی شواہد کے مطابق حادثے کی وجہ گیس لیکیج بتائی جا رہی ہے۔ حکام کا کہنا ہے کہ مکمل تحقیقات کے بعد واقعے کی حتمی رپورٹ جاری کی جائے گی۔
ماہرین نے شہریوں کو گیس سلنڈرز اور گھریلو گیس نظام کے استعمال میں احتیاط برتنے کی ہدایت کرتے ہوئے کہا ہے کہ معمولی غفلت بھی بڑے حادثات کا سبب بن سکتی ہے۔
