قطر اور امریکا کے درمیان خطے کی صورتحال پر اہم رابطہ، سفارت کاری اور مکالمے پر زور
قطر کے امیر شیخ تمیم بن حمد آل ثانی اور امریکی صدر ڈونلڈ ٹرمپ کے درمیان ٹیلی فون پر رابطہ ہوا ہے، جس میں مشرقِ وسطیٰ کی تازہ صورتحال، علاقائی سلامتی اور کشیدگی میں کمی کے امکانات پر تبادلہ خیال کیا گیا۔
قطری شاہی دیوان کی جانب سے جاری بیان کے مطابق گفتگو کے دوران امیرِ قطر نے خطے میں امن و استحکام برقرار رکھنے کی ضرورت پر زور دیتے ہوئے کہا کہ موجودہ حالات میں تمام فریقین کو تحمل کا مظاہرہ کرنا چاہیے اور تنازعات کے حل کے لیے سفارت کاری اور مذاکرات کا راستہ اختیار کرنا چاہیے۔
بیان میں کہا گیا ہے کہ قطر خطے میں بڑھتی ہوئی کشیدگی کو کم کرنے اور مختلف ممالک کے درمیان رابطوں کو فروغ دینے کے لیے اپنی سفارتی کوششیں جاری رکھے ہوئے ہے۔ امیرِ قطر نے اس موقع پر اس بات پر بھی زور دیا کہ کسی بھی ممکنہ تصادم سے بچنے کے لیے مکالمہ ہی مؤثر اور پائیدار حل ثابت ہو سکتا ہے۔
دوسری جانب امریکی صدر ڈونلڈ ٹرمپ نے خطے میں امن کے قیام اور کشیدگی میں کمی کے لیے قطر کے کردار کو سراہا۔ قطری حکام کے مطابق امریکی صدر نے پاکستان کی ثالثی اور سفارتی کوششوں میں قطر کے تعاون کو بھی مثبت قرار دیا اور علاقائی استحکام کے لیے جاری اقدامات کی تعریف کی۔
مبصرین کے مطابق مشرقِ وسطیٰ میں حالیہ تناؤ کے تناظر میں قطر کی سفارتی سرگرمیاں ایک بار پھر توجہ کا مرکز بن گئی ہیں، جبکہ مختلف ممالک کشیدگی کم کرنے اور تنازعات کے سیاسی حل کے لیے سفارتی رابطوں میں مصروف ہیں۔
